കാലത്തിന്റെ ഓര്‍മ്മപ്പെടുത്തലുകള്‍..
മാദ്ധ്യമപ്രവര്‍ത്തകനായ ബാബുവെളപ്പായയുടെ 75 കവിതകളുടെ സമാഹാരമായ ഓര്‍ക്കാതെങ്ങനെ… വായനക്കാരുടെ മുന്നിലെത്തി. സങ്കടത്തള്ളലില്‍ വീര്‍പ്പുമുട്ടി വിടരുന്നതാണ്
കവിതയെന്ന് ആമുഖത്തില്‍ പറയുന്ന കവി പ്രണയത്തിന്റെ പുതിയ ഭാവുകത്വങ്ങള്‍ തേടുകയാണ്.. കൊറോണയും മരണവുമെല്ലാം കാലത്തിന്റെ എല്ലാ വിഹ്വലതകളോടും കൂടി അവതരിപ്പിക്കപ്പെടുന്നു.
കാത്തിരുന്നപ്പോഴൊന്നും കനിയാത്ത കവിത ഓര്‍ത്തിരിക്കാതെ വിരുന്നെത്തുന്നവളാണെന്ന് ഓര്‍മ്മപ്പെടുത്തുന്ന കവി മാദ്ധ്യമപ്രവര്‍ത്തനത്തിന്റെ തിരക്കുകള്‍ക്കിടയിലും കൂടെനില്‍ക്കുന്ന സര്‍ഗ്ഗാത്മകതയുടെ അക്ഷരചൈതന്യത്തെ ചേര്‍ത്തുപിടിക്കുന്നു..
കവിതയെന്നുപറയുന്നില്ല, അവകാശവാദങ്ങള്‍ക്കുമില്ല
കവിതമണക്കുന്ന ചില കുറിപ്പുകള്‍ എന്ന് മാത്രമാണ് കവിയുടെ നിലപാട്. എന്നാല്‍ കാവ്യാത്മകമായ നിരവധി ബിംബങ്ങളിലൂടെ ആസ്വാദനത്തിന്റെ പുതിയ തലങ്ങളിലേക്ക് വായനക്കാരെ വഴിനടത്താന്‍ കവിക്ക് കഴിയുന്നു. ലളിതമായഭാഷയും വാക്കുളുടെ തെളിമയും കാല്‍പ്പനികഭാവങ്ങളും കവിതകളെ വേറിട്ടതാക്കുന്നു. ഉള്ളുതൊട്ട് ഇഷ്ടംകൂടിയവര്‍ക്കും നിറസൗഹൃദങ്ങള്‍ക്കുമാണ്
ഈ സ്‌നേഹാക്ഷരങ്ങള്‍ സമര്‍പ്പിക്കുന്നത്. പ്രശസ്ത ചിത്രകാരന്‍ ഫ്രാന്‍സീസ് കോടങ്കണ്ടത്തും ചിത്രകാരികൂടിയായ ഭാര്യ ഷേര്‍ളിജോസഫും ചേര്‍ന്നൊരുക്കിയ വരകളും ആസ്വാദനവും പുസ്തകത്തെ കൂടുതല്‍ ഹൃദ്യമാക്കുന്നു.. പ്രണത ബുക്‌സാണ് പ്രസാധകര്‍. നിഴല്‍ജാലകം (കവിതകള്‍), വാര്‍ത്തയില്‍ പറയുന്നത് (ഫീച്ചറുകള്‍), മരമച്ഛന്‍ കുഞ്ഞാറന്‍ (തിരക്കഥകള്‍) എന്നിവയാണ് ജീവന്‍ ടിവി ചീഫ് ന്യൂസ് എഡിറ്റര്‍ കൂടിയായ ബാബുവെളപ്പായയുടെ മറ്റ് പുസ്തകങ്ങള്‍.
